Home / Հայաստան / Հայաստանից դուրս գտնվողներն «արդեն քվեարկել են», արձանագրել են դիտորդները

Հայաստանից դուրս գտնվողներն «արդեն քվեարկել են», արձանագրել են դիտորդները

Սահմանադրության նախագծի հանրաքվեի ընթացքում «Քաղաքացի դիտորդ» նախաձեռնության դիտորդները բազմաթիվ ընտրախախտումներ են արձանագրում Հայաստանի տարբեր ընտրատեղամասերում։

14։00-ից հետո ներկայացված խախտումների մի մասը․

14:03

06/06 (Աջափնյակ)։ Բազմակի քվեարկություն է եղել տեղամասում, ընտրողներին ուղղորդում են, հանձնաժողովը մերժում է գրանցել խախտումները: Անհայտ, չգրանցված անձինք դիտորդի և լրագրողի հասցեին սպառնալիքներ են հնչեցրել՝ պնդլով, որ նրանք պետք է դադարեցնեն դիտորդությունը և հսկողությունը:

14:27

09/17 (Կենտրոն, Աջափնյակ), Հանձնաժողովի նախագահի կնիքը հայտնվել էր հանձնաժողովի անդամ Սոնայի մոտ, իսկ Սոնայի կնիքը հայտնվել էր աղբամանում։ ԿԸՀ-ին տեղեկացրել են դեպքի մասին, քվեարկությունը դադարեցրել են մինչև կորած կնիքը գտել են աղբամանից:

14:31

28/20 (Կոտայք), Հանձնաժողովի անդամներից մեկը սպառնացել է դիտորդներին, թե լցոնումների նկարները ուղարկվելու դեպքում նրա «վերջը լավ չի լինի»:

14:42

29/11 (Լոռի), Մի քանի դեպք է գրանցվել է, երբ իբր հաշմանդամները քվեարկում են մեքենայի մեջ: Քվեաթերթիկը դուրս է բերվում տեղամասից, քվեարկությունը կազմակերպվում է տեղամասից դուրս՝ տրանսպորտային միջոցի մեջ, որից հետո քվեաթերթիկը վերադարձվում է տեղամաս՝ վստահված անձի կողմից:

14:43

03/15 (Քանաքեռ Զեյթուն, Նոր-Նորք), Ընտրողը տեղամասից դուրս գալիս կաշառք ստացավ օղու տեսքով:

14:43

10/08 (Կենտրոն, Նորք-Մարաշ), Տեղամասում ժամը 14:00-ի դրությամբ գրանցամատյանում կա 130 ստորագրություն, սակայն տրվել է 150 քվեաթերթիկ։

14:48

12/11 (Շենգավիթ, Էրեբունի), Հանձնաժողովի նախագահը, անդամները խոչընդոտել են դիտորդների աշխատանքը, կյանքի համար վտանգավոր սպառնալիքներ են հնչեցրել, ահաբեկել են, որի արդյունքում դիտորդները` Գաբրիելյան Սերգեյը և Սահակյան Արմանը ստիպված են եղել լքել տեղամասը: Դիտորդները ունեն ձայնագրություն:

15:24

28/20 (Կոտայք), անհայտ անձինք լցոնել են քվեատուփը: Հանցագործությունը հանձնաժողովը չի արձանագրել:

15:25

29/08 (Լոռի), Քվեարկության սենյակում գտնվում են կողմնակի անձինք, ովքեր ազատորեն հսկում են ամբողջ գործընթացը:

15:33

31/59 (Լոռի), Դիտորդը հայտնել է, որ ընտրատեղամասի տարածքում գտնվում է այլ անձ, ով հայտնել է, որ գյուղապետարանի աշխատակից է և ուղղակի օգնում է: Դիտորդը դիմել է հանձնաժողովի նախագահին, որից հետո գյուղապետարանի աշխատակից ներկայացրած անձին հեռացրել են, բայց հետագայում նա կրկին շրջել է ընտրատեղամասում, ու նորից հեռացվելուց հետո, կրկին ներս է մտել:

15:35

03/06 (Քանաքեռ-Զեյթուն, Նոր Նորք), Դիտորդը նկատել է և տեսաձայնագրել, թե ինչպես հանձնաժողովի՝ ընտրողների ցուցակում գրանցման համար պատասխանատու անդամը, պարբերաբար ստորագրում է ընտրողների ցուցակում՝ հավանաբար հնարավոր բացականների անվան դիմաց և սեղանի տակ թաքցրած թղթի միջոցով կատարում է ճշգրտումներ: 

15:52

33/69 (Շիրակ), Հանձնաժողովի քարտուղարը փորձել է տրցակով լցոնում կատարել, դիտորդը տեսել է, որից հետո քարտուղարուհին տրցակով հեռացել է զուգարան։ Հանձնաժողովի նախագահը փորձել է բանակցել դիտորդի հետ, սակայն դիտորդը մերժել է։ Դիտորդը տեսանկարահանել է, թե ինչպես են քվեաթերթիկների տրցակը սեղանի տակից հանում, ինչպես են առանց կնիք աշխատում։

15:57

29/08 (Լոռի), Քվեարկելու եկած անձինք պարզել են, որ իրենց ազգականները, ովքեր գտնվում են Հայաստանից դուրս, արդեն «քվեարկել են»: Նրանք այդ փաստի մասին հայտնել են հանձնաժողովի նախագահին, ով չի արձանագրել խախտումը: