Դատապարտյալ. Ինձ խոշտանգել են ու չեն ազատել բանտի պետի տեղակալի դեմ բողոքելու համար (ՏԵՍԱՆՅՈՒԹ)

Շիրակի մարզի ընդհանուր իրավասության դատարանը երեկ քննել է «Արթիկ» ՔԿՀ–ում պատիժը կրող դատապարտյալ Արտակ Հակոբյանի դիմումը, որով վերջինս պահանջում էր վերացնել ՔԿՀ–ների վարչության հանձնաժողովի՝ իրեն վաղաժամ ազատելու դիմումը մերժելու մասին որոշումը:

Դատապարտյալը պնդում է, որ իրենից վրեժ են լուծում՝ կալանքի տակ պահելով, թեև նա պատժի երկու երրորդը կրել է և կարող է վաղաժամ ազատ արձակվել: Ըստ Հակոբյանի՝ վրեժի պատճառն այն է, որ իր ցուցմունքների հիման վրա համակարգի բարձրաստիճան պաշտոնյաներ են ձերբակալվել՝ «Նուբարաշեն» ՔԿՀ-ի պետի տեղակալ Դավիթ Մուրադյանը և նույն ՔԿՀ-ի ևս մեկ աշխատակից: Հանձնաժողովը մերժել է վաղաժամ ազատման դիմումը՝ պատճառաբանելով, որ Հակոբյանի ազատ արձակման ռիսկայնությունը բարձր է, նա ունի ինքնավնասման հակում, իսկ դատապարտյալի ուղղման գործընթացը հանձնաժողովի անդամները գնահատվել են որպես վատ:

Հիշեցնենք, որ «Նուբարաշեն» ՔԿՀ-ի պետի տեղակալ Դավիթ Մուրադյանը ձերբակալվել էր այս տարվա մայիսին Արտակ Հակոբյանից 14 հազար դոլար կաշառք ստանալու համար: 

Իր բողոքի քննության ժամանակ Հակոբյանը երեկ դատարանում հայտարարել է,  որ այդ պատճառաբանությունը շինծու է:

««Արթիկ» ՔԿՀ-ի ժամանակավոր պետի տեղակալ Աղասի Խաչատրյանը և սոցիալ-հոգեբանական բաժնի պատասխանատու Ռոբերտ Պետոյանն ինձ ասել են՝ քո պատճառով համակարգից երկու լուրջ մարդ է ձերբակալվել, եթե մենք քեզ բնութագրենք դրական, մեր հերը կանիծեն: Ինչ վերաբերում է իմ ինքնավնասումերին, ապա ինձ շորթել են, կաշառք են ուզել, վերցրել ու խաբել են: Ո՞վ իմ տեղը լիներ չէր ինքնավնասվի, ես մի մեշոկ փող եմ քցվել: Ես չեմ հերքում՝ Հրազդանում (նկատի ունի «Հրազդան» ՔԿՀ-ի խուցը – խմբ.) ես վառել են ամեն ինչ, ինքնավնասման փորձ եմ արել ու խնդրել եմ, որ ինձ տանեն «Նուբարաշեն», քանի որ պետի տեղակալի հետ խնդիրներ ունեմ: Փետրվարի 11-ից տեղափոխել են «Արթիկ» ՔԿՀ, անմարդկային պայմաններում ինձ պահել են պատժախցում 4 ամիս, քանի որ ցանկանում էին կաշառակեր Դավիթ Մուրադյանի գործը կոծկել»:,- դատարանում հայտարարել է Արտակ Հակոբյանը:

Դատապարտյալը, սակայն, ասել է, որ թեև Մուրադյանը կալանավորվել է, նրա ընկերները՝ ազատության մեջ են, դրանց թվին է պատկանում նաև Աղասի Խաչատրյանը և Ռոբերտ Պեպոյանը: Արտակ Հակոբյանը նաև նշել է, որ Խաչատրյանն ու Պետոյանն իրեն սպառնացել են թունավորել:

Ինչպես Epress.am-ին հայտնել է դատապարտյալի  կինը՝ Հայաստան Հակոբյանը, Մուրադյանին 14 հազար դոլար կաշառքը տալուց հետո էլ Արտակ Հակոբյանին չեն տեղափոխել «Դատապարտյալների հիվանդանոց» ՔԿՀ և վաղաժամ չեն ազատել, ինչպես պայմանավորված է եղել, դատապարտյալն էլ դիմել է ինքնավնասման՝ 2012 թվականի դեկտեմբերին կարելով աչքերը: Այդ քայլից հետո նրան խոշտանգել են, հետագայում նրան տեղափոխել են ոչ թե հիվանդանոց, այլ «Հրազդանի» ՔՀԿ, որտեղից էլ՝ «Արթիկ» ՔԿՀ և չորս ամիս պահել պատժիչ խցում:

Անկախ նշված հանգամանքներից՝ դատարանը նախագահող Աշոտ Մանուկյանի գլխավորությամբ մերժել է դատապարտյալի դիմումը և չի վերացրել նրա ազատ արձակումը մերժելու մասին հանձնաժողովի որոշումը:

Նշենք, որ Հակոբյանը խուլիգանության հոդվածով դատապարտվել է 5,5 տարվա ազատազրկման, որից 3,5 տարին արդեն անցկացրել է բանտում: Հոկտեմբերի 3-ին ԱԺ-ի կողմից ընդունված համաներման որոշմամբ՝ Հակոբյանի պատիժը կրճատվել է 1 տարով: