ՌԴ սահմանապահները խոչընդոտել են «Ժառանգության» քարոզարշավը, կոտրել են տեսախցիկը

Երեկ երեկոյան Սյունիքի մարզի Լիճք գյուղի մոտ ռուս սահմանապահները կանգնեցրել են «Ժառանգության» կուսակցության մեքենաները, որոնք 38 ընտրատարածքի պատգամավորական ընտրությունների քարոզարշավն էին իրականացնում:

ՀՀ ԱԺ պատգամավոր Զարուհի Փոստանջյանը հետաքրքրվել է, թե ինչ իրավունքով են ռուսաստանյան ՖՍԲ-ի ծառայողները միջպետական ճանապարհին մեքենաներ կանգնեցնում: Այդ պահին «Ժառանգության» ներկայացուցիչ Դավիթ Հակոբյանը սկսել է տեսագրել զրույցը, սակայն նրա վրա հարձակվել են ու կոտրել են տեսախցիկը:

Ինչպես հաղորդում է aravot.am-ը, միջադեպից հետո Զարուհի Փոստանջյանի հետ սկսել է բանակցել ՌԴ սահմանապահ զորքերի հրամանատար Միրզոևը, ով բացատրություն է տվել դեպքի հետ կապված:  

«Իրենք ասացին, որ ներողություն են խնդրում և պատրաստ են անմիջապես փոխհատուցել մեր վնասված տեսախցիկի համար: Բայց մենք ասացինք, որ պետք է մեզանից առաջին հերթին միջադեպի համար պաշտոնապես ներողություն խնդրեն, երկրորդը՝ փոխհատուցում տրամադրեն՝ մեզ պատճառած վնասի համար և երրրորդը՝ պատասխանատվության կանչեն իրենց այն զինծառայողին, ով այդ պահին այդտեղ ծառայություն է  իրականացրել: Իրենք պետք է գործին պաշտոնական ընթացք տան, ոչ թե իրենց կողմից հնչեն բանավոր հայտարարություններ: Չնայած այդ պաշտոնատար անձինք իրենց բավականին կոռեկտ էին պահում և հասկանում էին այդ պահին, թե ինչ է տեղի ունեցել, և որ մեղավորությունը իրենց աշխատակցի վրա էր: Իրենք ընդունել են, որ սխալ են եղել: Հիմա մեր պահանջը պաշտոնապես ընթացք տալն է: Իրենք խոչընդոտել են մեր քարոզարշավը: Եթե մենք չասեինք, որ կդիմենք իրավապահ մարմիններին, չեմ բացառում, որ այդտեղ մեր նկատմամբ նաև բռնի ուժ էլ կկիրառվեր: Սա բռնության փորձ էր, բռնի ուժով ցանկանում էին տեսախցիկը վերցնել», – aravot.am-ի հետ զրույցում ասել է Փոստանջյանը:

Նա վստահեցրել է, որ իրենց տեսախցիկիը կոտրողը եղել է հատուկ համազգեստով, որի վրա նշված է եղել՝ ФСБ. «Ես մոտեցա իրեն և ռուսերենով խնդրեցի պարզաբանում: Իրենք հաղորդակցվում էին ռուսերենով»:

Զարուհի Փոստանջյանի խոսքով՝  մինչև իրենց ճանապարհի վրա կանգնեցնելը իրենք արդեն ճշտած են եղել, թե ովքեր են այդ մեքենաներում. «Մեզանից ցերեկը փաստաթուղթ են պահանջել, զեկուցել են իրենց վերադասին: Զեկույցից հետո մեզ ասացին՝ բաց թողեք նրանց, կարող են անցնել: Երկրորդ անգամ նորից ստուգում եղավ, մեքենայի խուզարկություն, ինքնության ստուգում: Իսկ երբ հիմնավորումներ խնդրեցինք իրենց գործողությունների համար, բախվեցինք այդպիսի խոչընդոտների: Եթե մենք բողոք չբարձրացնեինք, նրանք զինված էին ինքնաձիգով, և ես չեմ բացառում, որ մեր անձի հետ կապված ոտնձգություններ եւս տեղի ունենային»:

Պատգամավորը նաև նշել է, որ հետագայում իրենց բացատրել են, որ իրենք օգնում են Հայաստանի իրավապահ մարմիններին գտնել այն անձին, ում կասկածում են թմրամիջոցների փոխադրման մեջ, ով փախուստ է ձեռնարկել: Նա Իրանի քաղաքացի է, ում կասկածում են թմրադեղերի տեղափոխման մեջ, արդեն իսկ ձերբակալված է եղել, տեղափոխել են դեպի Երևան, բայց փախուստի է դիմել: