Home / Հայաստան / Գիշերը 4 ակտիվիստի բերման են ենթարկել քաղաքապետարանի մոտից

Գիշերը 4 ակտիվիստի բերման են ենթարկել քաղաքապետարանի մոտից

Այսօր գիշերը Երևանի քաղաքապետարանի մոտից ոստիկանները 4 ակտիվիստի բերման են ենթարկել Երևանի ոստիկանության կենտրոնի բաժին: Այս մասին 6 ժամ առաջ Facebook սոցիալական ցանցի իր էջում գրել է քաղաքացիական ակտիվիստ Ռուզաննա Գրիգորյանը` նշելով, որ եղել է քաղաքապետարանի մոտ և ականտես է եղել բերման ենթարկելու դեպքերին:

«Երեքին՝ Վահագն  Մինասյանին, Սուրեն Սահակյանին և Գոհար Սարոյանին քաղաքապետարանի աստիճաններին պառկելու համար, իսկ չորրորդին՝ Կարեն Հարությունյանին, իրավական հիմնավորումներ պահանջելու համար։ Անգիր արած կրկնում էին, որ «տանում ենք ոստիկանի իրավական պահանջը չկատարելու համար», բայց երբ հարցնում ես «որն է այդ օրինական պահանջը, ներկայացրեք իրավական ակտը», ոչ մի բովանդակային պատասխան չեն տալիս։

Այս չորս դեպքերից և ոչ մեկի դեպքում ոստիկաններին այդպես էլ չհաջողվեց ձևակերպել իրավական հիմնավորումը՝ հղում անելով օրենքին։ Ի դեպ, երբ ոստիկաններին իրարից անկախ տարբեր պահերի հարց էինք տալիս արդյոք օրենքով արգելաված է քաղաքապետարանի աստիճաններին պառկելը, մի մասն ասում էր այո, մի մասը՝ ոչ։ Այն հարցին արդյոք քաղաքապետարանի աստիճաններին կարելի է կանգնել, այսօր բոլոր ոստիկանները պատասխանեցին՝ այո։ Այն դեպքում երբ երկու օր առաջ աստիճաններին կանգնելու համար մի խումբ քաղաքացիների բերման էին ենթարկել կենտրոնի բաժին։ Մի խոսքով, ոստիկանությունը չգիտի կամ չի ուզում իմանալ օրենքը, ըստ այդմ չի գործում օրենքով, կատարում է ԱՊՕՐԻՆԻ ՀՐԱՄԱՆՆԵՐ», – գրել է Գրիգորյանը:

Լրագրող, ակտիվիստ Թեհմինե Ենոքյանը տարածել է նաև ակտիվիստների լուսանկարները: Նշենք, որ երեկ Ենոքյանը նաև տեսանյութ էր տարածել, որում երևում է, թե ինչպես են ոստիկանները պաստառը փռում Երևանի քաղաքապետարանի առջևի նստացույցի մասնակցի վրա, երբ նա քնած է, այդպես նկարում են նրան և ծիծաղում։