Վարչապետից դժգոհ են. ազատամարտիկն ասել է՝ որ պայմանով կդադարեցնի հացադուլը

Երեկ կառավարության շենքում կայացած հանդիպման ժամանակ ազատամարտիկներին հուսադրող ոչինչ չեն ասել: Նրանցից մեկը՝ Խաչիկ Ավետիսյանը, ասել է, թե որ պայմանով կդադարեցնի հացադուլը:

Հուլիսի 13-ից Ազատության հրապարակում հացադուլ հայտարարած ազատամարտիկ, պահեստազորի փոխգնդապետ Խաչիկ Ավետիսյանը կդադարեցնի հացադուլը հուլիսի 28-ին՝ ժամը 18.00-ին, այն պայմանով, որ այդ օրը Ազատության հրապարակում 10.000 մարդ կհավաքվի: Այս մասին ազատամարտիկը հայտարարել է այսօր Ազատության հրապարակում հրավիրած ասուլիսի ընթացքում:

«Իմ պահանջը ուղղված է համայն հայությանը, ու եթե իմ նախատեսած հավաքը չկայանա, ապա ևս 10 օր կշարունակեմ հացադուլը ու այսպես պարբերաբար մինչև հայ մարդն իր մտքից կհանի այն կործանարար հիվանդությունը, որը կոչվում է պարտվողական գոյատևում», – ասել է Ավետիսյանը:

Նա նշել է, թե ինքն ապստամբության կոչեր չի անելու, իրեն պարզապես պետք է ժողովրդի աջակցությունը: «Մենք չէինք գնացել կռվելու այսօրվա Հայաստանի համար, իմ ընկերները չէին զոհվել այս օրվա համար», – ասել է Ավետիսյանը:

Վերջինս հիշեցրել է, որ երեկ վարչապետ Տիգրան Սարգսյանի հետ հանդիպումից հետո իր մարտական ընկերները դատարկաձեռն են վերադարձել:

«Գրավոր ներկայացրած մեր պահանջները  նույնությամբ՝ թղթի վրա հետ են վերադարձրել: Կառավարությունից  ակնկալվող պատասխանի թուղթն էլ դատարկ է», – եզրափակել է փոխգնդապետը:

Խաչիկ Ավետիսյան

Ազատամարտիկների շարժումը ղեկավարող, պահեստազորի գնդապետ Վոլոդյա Ավետիսյանն էլ նշել է, որ վարչապետը ոչ մի լուծում չի առաջարկել՝ ընդամենը ժամանակ է խնդրել:

«Ասացի, որ ազատամարտիկները ծայրահեղ վիճակում են գտնվում՝ թանկացել են գազը, լույսը, տրանսպորտը, ի վերջո՝ կյանքը ու նույն  47 հազար ստացողը էլի 47 է ստանալու, հետաքրքիր է՝ ո՞նց է ապրելու: Նայելով մեր կառավարությանը՝ հասկացա, որ կառավարությունն ընդհանրապես մեր մասին չի մտածում, ուղղակի գնացինք, նստեցինք, իրար տեսանք, 1,5 ամիս ժամանակ խնդրեցին՝ ցուցակներ կազմելու, ճիշտ ու սուտ ազատամարտիկ իրարից զատելու համար: Մենք դժգոհ ենք ու շարունակելու ենք բողոքել», – նշել է Ավետիսյանը:

Նշենք, որ ազատամարտիկները բողոքի ակցիաներ են կազմակերպում մայիս ամսից: Նրանց նվազագույն պահանջներն են՝ կենսաթոշակների բարձրացում, բժշկական անվճար օգնության տրամադրում: